An Cheist

 

 


Curfá


Bliain na pandéime

Bliain trína chéile

Srianta is rialacha

A’ bhfuil aon rud le ceiliúradh?


 Suaimhneas is ciúnas mórthimpeall orainn

An spéir gheal ghlan gan scamall  

Faoiseamh iontach dos na héiníní

Buairt uafásach ar O’Leary!


Curfá


Am sa bhreis ag formhór againn

Chun aithne a chur ar a chéile

Ionsaí sa bhaile do thuilleadh againn

Greamaithe sa tig gan rogha


Curfá


An t-uaigneas níos measa do chuid againn  

Le bás ár muinntir gan tórramh againn

Gan ach dlúth cháirde in aice linn

Sin mar a b’fhearr le roinnt againn.


Curfá


Buairt agus brú ar an óige

Gan chairdeas, gan rince, gan cheol acu

Iomad ama dá chaitheamh ar na meáin acu

Ag crochadh timpeall gan treo acu.


Curfá


Follúntas mhór dá lán againn

Gan obair, gan togra ná rogha againn

Spás don chruthaitheacht do roinnt againn

Chun bóthar’s treo nua a roghnú againn


Curfá


Anois a ghlaoim ar fhilí na dúithí  

Mar onór ’s ómós d’ár sinnsear

Dáimhscoil Mhúsraighe a choimeád beo beathach

Leis an gCeist seo rómhaibh a fhreagairt.


Curfá


Na bóithre deas ciúin ’is sábhálta

Balaithe breá cumhra na bhfiailí ann

Daoine ag siúl, ag rith is ag rothaíocht leo

Na h-ainmhithe saor ….

Gobnait Ní Chruadhlaoich

Uachtarán

 

 

 

 

An Cheist 2019

Nuair a fheicim an ghlúin nua ag teacht

Ní thagann orm aon lag mhisneach

Mo pháistí féin, gasra óg Ghaeil 

Fuinniúil, spreagtha is lán le taispeach.

Líonann mo chroí le dóchas is muinín

Nuair a bhrathaim talann mo mhac is m’iníon

Acu san an éirim atá in ann don dúshlán

Ár gcultúr ar leith a thabhairt i réim arís.

Fag an bealach agus géill an slí

Do dhream dearg le fearg is lán le brí

Réabhlóid a sprioc, a chasann de shíor

Is fearrde ár dteanga amach sa todhchaí.

Labhrann siad i dteanga nach dtuigfeadh ár sinsir

Gaeltacht a fhásann ó h-oíche go h-oíche

Téacsais is téarmaíocht ó shaol atá ar mire 

Is rapannaí a cheiliúrann saol nach gcleachtaimídne.

Ní hé an sean nós tús nó deireadh an scéil

Ní hé Corn Uí Riada an t-aon craobh 

Tá claochló sa tsiúl is éabhlóid ag tarlú 

Athrú ar an saol is an Ghaoluinn dá réir. 

Cad a dhéanfaimíd atá ag imeacht in aois?

An éistfear linn? Bhfuil feidhm lenár ngaois?

Rud amháin cinnte, éist liom anois

Ní h-éireoidh le toirmeasc cros nó cinsireacht.

An féidir an dhá shruth a cheangal 

In abha mhór, díle na nGael

A scuabfaidh lei i tulca ón sliabh

Freasúra inár slí anois agus riamh? 

Concubhar Ó Liatháin, Cléireach.